Shaddai Sugar Arts & Crafts a wòrdu fundá basá riba e pashon inkreibel di sra.Tramm pa dekorashon di bolo i mui spesialmente arte di suku. Loke den añanan 70 a kumisá komo hòbi, a desaroyá sumamente rápido den e abilidat pa traha i dekorá bolo profeshonalmente uzando asina arte di suku sentral den e dekorashon. E demanda pa bolonan dekorá pa sra.Tramm a krese i a bira asina popular, ku e vishon pa laga Kòrsou kompleto disfrutá di bolonan dekorá “Otro for di tur otro” i ku un sabor eskisito a bira un echo.
For di 2007 “Shaddai Sugar Arts & Crafts” ta é sentro kaminda rònt Kòrsou ta enkargá ku dekorashon di bolo. A traha entre otro e fachada kompletu di “Curaçao International Airport” i di “Dios Yuda’mi”. Tambe tabatin e enkargo di 2500 ‘cupcakes’ pa 3 aña konsekutivo riba dia di Bandera na Brion Plein. Banda di e hazañanan remarkabel akí, Shaddai Sugar Arts & Crafts a keda rekonosé diferente biaha pa medionan di komunikashon; manera entre otro e artíkulo skibí pa korant EXTRA tokante e eksposishon “Risibimentu Ántes i Awor” na sèptèmber 2005 i e entrevista eksklusivo ku Melania van der Veen di Bo Tra’i Mèrdia na desèmber 2015.
Awe, Shaddai Sugar Arts & Crafts ta un sentro pa dekorashon di bolo i arte di suku konfiabel ku ta fiha su bista riba kalidat, profeshonalismo i akabashon. Tambe Shaddai Sugar Arts & Crafts ta ofrese Kòrsou “Sugar Art School” kaminda studiantenan, bou di instrukshon i guia di sra.Tramm ta atkerí abilidatnan unda na final nan lo risibí un sertifikado, komo prueba ku nan ta dominá e materia i a finalisá e kurso ku éksito.
Nos Mishon
Nos mishon ta pa krea e bolonan di mas eskisito i artenan di suku di mas espektakular na Kòrsou. Nos ta haña e inspirashon for kada kliente ku aserká nos ku nan ideanan. Kada obra ku nos krea i entregá tin un diseño spesial i úniko den su estilo ku for di su konsepto te na ora di konsumo ta un piesa totalmente original. Ku e eksperensia i profeshonalismo ku nos ta disponé di dje, nos ke kumpli òf te asta surpasá e kliente su eskpektativanan. For di ora abo por imagin’é, nos por kre’é. Banda di esaki, nos ke instruí i duna guia na interesadonan di arte di suku pa medio di e kurso i workshopnan ku nos ta ofresé.
Nos Vishon
Nos ta kere ku tur hende meresé un bolo ku un sabor outéntiko i artenan di suku eksepshonal. Ta p’esei nos ta komprometé pa krea esakinan. Nos vishon ta pa nos pensamentunan “Otro for di tur otro” i nos sabornan ku no tin pa igualá, re-inventá e manera ku nos klientela ta difrutá di nos produkto i servisionan. Pa medio di “Shaddai Sugar Arts School” nos ke kontruí un ret di artistanan di suku na Kòrsou ku den futuro, tin e kapasidat pa huntu ku nos trese inovashonnan den arte di suku.